Desde que no verán do 2016 comezaron os traballos arqueolóxicos no Castro de San Lourenzo xa se ten obtivo moita información do modo de vida nos séculos XII, XIII e XIV nesta zona do interior. Nesta cuarta campaña vaise ampliar o espazo de escavación e afondar máis na necrópole con tumbas do século XII. O equipo de traballo, dirixido polo arqueólogo Xurxo Ayán, espera poder atopar o templo asociado á necrópole que tamén sería a orixe da igrexa de San Lourenzo, na parroquia de Cereixa.
Esta cuarta campaña desenvólvese gracias ao convenio asinado entre o concello da Pobra do Brollón e a Dirección Xeral do Patrimonio. Ao mesmo tempo o concello tamén asinou un convenio coa Dirección Xeral de Xuventude, Participación e Voluntariado polo que na primeira quincena do mes de agosto se desenvolverá no Castro de San Lourenzo un campo de traballo internacional que permitirá que unha vintena de moz@s executen labores de saneamento e apoio ás escavacións.
O Castro de San Lourenzo é ademais punto de referencia central en dúas das propostas de visitas guiadas que este verán comezou a organizar o concello da Pobra do Brollón. Con todo, desde o equipo de goberno quérese impulsar e dinamizar os principais recursos turísticos a patrimoniais do concello e neste abano de propostas o Castro de San Lourenzo ten un papel fundamental.
