Fin de semana de foliada, fiesta y teatro en A Pobra do Brollón
Comeza unha fin de semana na Pobra do Brollón cunha intensa actividade cultural e festiva. A programación arranca este venres 26 cunha ‘foliada guímara’ na parroquia de Eixón.
Aproveitando o patrón da parroquia, San Xurxo, será unha foliada con temática literaria na que se anima aos asistentes a levar algún libro de segunda man para intercambiar.
Ademais, porase a disposición unha caixa de suxestións para compra de libros da Biblioteca municipal da Pobra do Brollón. Animando a foliada estará o grupo Grolo, dúo de saxofón e guitarra que fan música tradicional fusionado. A comisión de festas de Eixón poñerá barra e caldo comunitario, para o que animan aos asistentes a levar cunca e culler.
O sábado trasládase a festa á parroquia de Vilachá de Salvadur, concretamente á aldea de Trasmonte onde o Furancho O Currio recupera a festa de San Marcos. A xornada comeza ás 12:00 do mediodía cunha alborada e paseo por Trasmonte da man da veciñanza e vermú final en O Currio. Pola tarde, ás 16:30 hai campionato de tute e a partir das 20:00, actuará o Dúo Millenial. Para máis información, o teléfono de contacto é 623464540.
A actividade da fin de semana péchase o domingo coa obra teatral Boa sorte, mala fama, da compañía Tarabela Creativa. O espectáculo, escrito e dirixido por Carmen Conde, combina narración oral, música ao vivo e interpretación actoral para contar a historia máis incómoda da nosa emigración a través de distintas épocas e persoas.
A obra será ás 19:00 h na Casa da Cultura ‘Olga Novo’ con entrada libre ata completar aforo. O espectáculo conta cunha axuda da Área de Cultura da Vicepresidencia da Deuptación de Lugo.
