O Castro de San Lourenzo en Cereixa acolle este verán unha nova campaña arqueolóxica con campo de voluntariado
Trala confirmación por parte da Consellería de Xuventude da realización dos campos de voluntariado en Galicia, o Concello da Pobra do Brollón anuncia a continuidade do campo no Castro de San Lourenzo, situado en Cereixa.
O campo de voluntariado terá lugar do 2 ao 13 de agosto e está aberto a persoas mozas residentes en Galicia entre 18 e 30 anos. O número máximo de participantes son 12 e xa está aberto o prazo de inscrición.
“Entendemos que se a Xunta dá luz verde aos campos de voluntariado é porque se dan as condicións. Nós estabamos preparados a nivel municipal e alégranos moito poder continuar con estes traballos que repercuten na economía e na comunidade local,” comenta o alcalde Xosé Lois Maceda.
Un campo arqueolóxico
Os participantes poderán coñecer de primeira man o proceso de escavación dunha necrópole medieval, sector onde se centrarán os traballos este ano e no que apareceu o famoso Atilano, un esqueleto en moi bo estado de conservación atopado na campaña de 2018.
“Trátase dunha das necrópoles medievais mellor conservadas e estudadas de Galicia polo que é unha oportunidade para os participantes de recibir unha formación pouco habitual,” comenta Xurxo Ayán, director arqueolóxico do proxecto.
Os traballos arqueolóxicos véñense realizando dende 2016 e en sucesivas campañas, o castro de Cereixa converteuse nun referente internacional da arqueoloxía en comunidade.
Un campo comunitario
Ademais da arqueoloxía, na organización do campo perséguese a implicación dos participantes co proxecto e cos veciños. En anos anteriores o campo de traballo coincidía coa romaría de San Lourenzo.
“Este ano debido á crise sanitaria non se realizará a romaría, mais os voluntarios poderán participar noutro tipo de xuntanzas máis informais cos veciños,” comenta Ayán.
Un campo con medidas excepcionais
O contexto sanitario, por suposto, marca enormemente as características desta edición, seguindo as medidas de seguridade marcadas pola Xunta.
Este ano só participarán voluntarios residentes en Galicia, fronte o carácter internacional doutros anos. Asemade, o número máximo establécese en 12, en troques de 20 como en edicións anteriores.
Por outra banda, existe un protocolo sanitario marcado polo distanciamento, hixiene e uso de máscara. “Trátase de equilibrar a precaución coa necesidade de dar continuidade aos proxectos que incentivan a economía local,” comenta Maceda.
As persoas interesadas en participar poden atopar máis información e inscribirse en http://xuventude.xunta.es/accion-de-veran
